《夏日的溫度》
作為一個城市人無冷氣真係會死，我自己住嘅時候，幾乎係一返到就會開冷氣，仲諗過有冇遙距開冷氣嘅機，可以係返到之前開定冷氣嘆，但返咗去同阿爸阿媽住時，我發現一個奇怪嘅習慣，就係夜晚先開冷氣。
一日最唔熱就係夜晚，但每次係我返到屋企先會開冷氣，下午時份爸媽係甚少開冷氣，只係開住風扇。
細個住係白田村公屋，一個長方形嘅單位，每晚最期待係咩時候，就係阿爸返屋企，然後我哋就會好雀躍咁話開個冷氣啦，然後得到批準先可以開。
老婆反而唔同，佢日頭熱一定開，夜晚訓個陣就怕凍有時會關冷氣，我問阿爸阿媽，你哋唔熱咩，熱啊，慳電嘛，咁我都知冷氣費都幾貴，不過有需要就應該要用啦。
上一代人好唔同，佢哋比較慳，外母係出街會熄拖板電添，熱水爐唔係沖涼都唔會開住，用完即關，佢哋會為咗慳一蚊而等一班平嘅車，會為咗買餸平而行半個鐘去另一個街市買。
我哋呢代，都有返咁上下年紀，自己住都會慳，但未去到上一代嘅程度。
明明阿爸阿媽搵唔多，但佢哋都仲可以儲到錢，仲可以養大三個小朋友，以前我返學要交咩費物費都唔會猶豫，幾百蚊補習都係個個月俾錢，易地而處，如果佢哋唔慳的話，真係會好吃力，而呢種慳，已成習慣。
呢排疫情，每日起身，都會有份外賣早餐係度等我食，阿爸退咗休，我有時叫佢唔好買俾我，慳返少少錢自己食，我出去食都可以啊，但即刻我咁講都好，每朝，都係有唔同嘅早餐等我。
而放工，一返到嚟阿爸都會即刻關門關窗，開個冷氣俾我涼。
好彩我有好嘅父母，佢哋慳，但從來都係慳自己，對子女永遠都係大方。
開冷氣，一件好簡單嘅事，但做法，你可以從中感受到一種愛。
晚飯之後，涼住冷氣，睇住電視，食住西瓜，呢個係夏天獨有嘅溫度，涼在身，暖在心。
－－－－－－－－－－－－－－－－－－－－－
有興趣購買《弊傢伙，我女朋友有咗》的朋友，可以經以下連結購買：
Payme, FPS, Alipay連結：https://forms.gle/UEdH32PfVD2cp5nK6
掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
另外，如果各位對於角落生物有興趣的話，有款香港品牌嘅茶同佢crossover，詳情可以點擊以下連結，純粹係幫朋友係呢個經濟下撐落去，無收任何廣告及產品贊助
https://www.lashan-teaddict.com.hk/categories/%E8%A7%92%E8%90%BD%E5%B0%8F%E5%A4%A5%E4%BC%B4-2020%E8%81%AF%E4%B9%98
Search